დაბრუნებისა და თანხის დაბრუნების პოლიტიკა

ამ პოლიტიკაში აღწერილია, როდის შეგიძლიათ შეკვეთის გაუქმება, ხელშეკრულებაზე უარის თქმა და თანხის დაბრუნება, ასევე რა ხდება გაუმართავი ლიცენზიის კოდის შემთხვევაში.

1. ზოგადი წესი

საქართველოს კანონის „მომხმარებლის უფლებების დაცვის შესახებ“ თანახმად, დისტანციურად (ინტერნეტით) დადებულ ხელშეკრულებაზე მომხმარებელს შეუძლია უარი თქვას 14 კალენდარული დღის განმავლობაში, მიზეზის მითითების გარეშე. ციფრულ პროდუქტსა და მომსახურებაზე კანონი გამონაკლისებს ითვალისწინებს — ისინი აღწერილია ქვემოთ.

2. ციფრული პროდუქტი (ლიცენზიის კოდი, გამოწერა)

2.1. რატომ იკარგება დაბრუნების უფლება

ლიცენზიის კოდი არამყარი მატარებლით მიწოდებული ციფრული შინაარსია: მისი ნახვისთანავე შესაძლებელია მისი გამოყენება და ფიზიკურად „უკან დაბრუნება“ შეუძლებელია. ამიტომ, კანონის მე-14 მუხლის შესაბამისად, ხელშეკრულებაზე უარის თქმის უფლება იკარგება, თუ მიწოდება დაიწყო თქვენი წინასწარი თანხმობით და იცოდით, რომ ამით ამ უფლებას კარგავდით.

შეკვეთის გაფორმებისას ეს თანხმობა ცალსახად გამოიხატება: checkout-ში უნდა მონიშნოთ „ვეთანხმები, რომ ციფრული კოდის/ლიცენზიის მიღებისთანავე ვკარგავ შეძენილი პროდუქტის დაბრუნების უფლებას“. მის გარეშე შეკვეთა არ ფორმდება. თანხმობის დრო ინახება შეკვეთაში. იგივე თანხმობა ითხოვება კორპორატიული შეთავაზების დადასტურებისას.

2.2. როდის შეგიძლიათ გაუქმება და სრული თანხის დაბრუნება

კოდის მიწოდებამდე — თუ შეკვეთა ჯერ გადაუხდელია, ან გადახდილია, მაგრამ ლიცენზიის კოდი ჯერ არ გაცემულა (არ ჩანს გვერდზე „ჩემი ლიცენზიები“). დაგვიკავშირდით და შეკვეთას გავაუქმებთ, გადახდილ თანხას კი სრულად დაგიბრუნებთ.
ჩვენი მიზეზით გაუქმებისას — თუ პროდუქტის მიწოდება ვერ მოხერხდა (მაგ. მარაგი ამოიწურა), ფასი შეცდომით იყო მითითებული ან შეკვეთა სხვა მიზეზით გავაუქმეთ.
ორმაგი ან შეცდომით შესრულებული გადახდისას — ზედმეტად გადახდილ თანხას სრულად დაგიბრუნებთ.

2.3. გაუმართავი ან არაშესაბამისი კოდი

თუ მიწოდებული კოდი არ აქტიურდება, უკვე გამოყენებულია ან არ შეესაბამება შეკვეთილ პროდუქტს (სხვა ვერსია, გამოცემა ან ვადა), ეს არის ნაკლი და დაბრუნების უფლების დაკარგვა მასზე არ ვრცელდება.

მოგვწერეთ hello@b2service.ge-ზე ან WhatsApp-ზე +995 557 66 70 50 შეკვეთის ნომრით, პროდუქტის დასახელებით და შეცდომის ტექსტით ან ეკრანის სურათით.
ვამოწმებთ კოდს და, საჭიროების შემთხვევაში, გთავაზობთ გააქტიურებაში დახმარებას — ხშირად პრობლემის მიზეზი არასწორი გამოცემა ან გააქტიურების ნაბიჯია.
თუ კოდი ნამდვილად გაუმართავია, უფასოდ შეგიცვლით სხვა კოდით. თუ შეცვლა შეუძლებელია, დაგიბრუნებთ ამ პროდუქტისთვის გადახდილ თანხას სრულად.

პრობლემის შესახებ გვაცნობეთ კოდის მიღებიდან რაც შეიძლება მალე, სასურველია 14 დღის განმავლობაში. ეს ვადა არ ზღუდავს თქვენს კანონიერ უფლებებს ნაკლიან პროდუქტზე.

2.4. როდის არ ბრუნდება თანხა

კოდის მიწოდების შემდეგ თანხა არ ბრუნდება, თუ:

გადაიფიქრეთ ან პროდუქტი აღარ გჭირდებათ;
შეცდომით შეიძინეთ სხვა პროდუქტი, ვერსია ან გამოცემა, მიუხედავად იმისა, რომ პროდუქტის გვერდზე სწორი ინფორმაცია ეწერა;
კოდი გააქტიურდა, შემდეგ კი მოწყობილობის შეცვლის, ხელახალი ინსტალაციის ან აპარატურის ცვლილების გამო ვეღარ ააქტიურებთ ლიცენზიას, რომელიც მწარმოებლის წესებით ერთ მოწყობილობაზეა მიბმული (მაგ. OEM);
კოდი გაუზიარეთ სხვა პირს ან ის თქვენი მიზეზით გახდა ცნობილი მესამე პირისთვის;
ლიცენზია დაიბლოკა მწარმოებლის პირობების დარღვევის გამო თქვენი მხრიდან.

ასეთ შემთხვევებშიც, თუ შეგვიძლია, დაგეხმარებით — მაგ. მწარმოებლის მხარდაჭერასთან დაკავშირებით.

3. ბანდლები

ბანდლი ერთი პროდუქტია ფიქსირებული ფასით. თუ ბანდლის ერთ-ერთი კოდი გაუმართავია, შევცვლით მას. თუ შეცვლა შეუძლებელია, დაგიბრუნებთ მის წილ თანხას, რომელიც ბანდლის ფასიდან პროპორციულად გამოითვლება ცალ-ცალკე ფასების მიხედვით.

4. მომსახურება

მომსახურებაზე უარის თქმა შეგიძლიათ ხელშეკრულების დადებიდან 14 კალენდარული დღის განმავლობაში.
თუ თქვენი თხოვნით მომსახურება ამ ვადაში დავიწყეთ, ხოლო შემდეგ უარი თქვით, გადახდილი თანხიდან გამოიქვითება უკვე გაწეული სამუშაოს ღირებულება.
სრულად გაწეულ მომსახურებაზე უარის თქმის უფლება იკარგება, თუ შესრულება დაიწყო თქვენი წინასწარი თანხმობით და იცოდით, რომ ამ უფლებას კარგავდით.
თუ მომსახურება ჩვენი მიზეზით არასათანადოდ შესრულდა, უფასოდ გამოვასწორებთ, ხოლო თუ ეს შეუძლებელია — შესაბამის თანხას დაგიბრუნებთ.

5. როგორ მოითხოვოთ გაუქმება ან თანხის დაბრუნება

გამოგვიგზავნეთ ცალსახა განცხადება ელფოსტით hello@b2service.ge (სასურველია ანგარიშის ელფოსტიდან). მიუთითეთ:

შეკვეთის ნომერი;
პროდუქტი ან მომსახურება;
მოთხოვნის მიზეზი (უარის თქმის უფლების გამოყენებისას — არასავალდებულო);
გადარიცხვით გადახდისას — ანგარიში, რომელზეც თანხა უნდა დაბრუნდეს, თუ ის განსხვავდება გადამხდელის ანგარიშისგან.

განცხადების მიღებას დაგიდასტურებთ და პასუხს გაცნობებთ ელფოსტით. შეკვეთის გაუქმების შემთხვევაში მიზეზი ჩანს „ჩემ შეკვეთებში“ და ინვოისზეც.

6. თანხის დაბრუნების ვადა და წესი

თანხას ვაბრუნებთ გაჭიანურების გარეშე, არაუგვიანეს 14 კალენდარული დღისა მოთხოვნის დაკმაყოფილების ან შეკვეთის გაუქმების დღიდან.
ბარათით გადახდისას თანხა ბრუნდება იმავე ბარათზე, იმ ბანკის მეშვეობით, რომლითაც გადაიხადეთ (საქართველოს ბანკი ან თიბისი ბანკი). განვადებისას დაბრუნება ხდება იმ ბანკის მეშვეობით, რომლის განვადებითაც იყიდეთ, განვადების ხელშეკრულების მიხედვით. ქულებით გადახდისას ქულები ბრუნდება საქართველოს ბანკის წესებით. ბანკიდან გამოსვლის შემდეგ თანხის ასახვას თქვენს ანგარიშზე, როგორც წესი, 1-დან 10 სამუშაო დღემდე სჭირდება — ეს თქვენი ბანკის წესებზეა დამოკიდებული.
საბანკო გადარიცხვით გადახდისას თანხა ბრუნდება იმ ანგარიშზე, საიდანაც გადაიხადეთ; კომპანიის შეკვეთაზე — კომპანიის ანგარიშზე.
ბრუნდება ფაქტობრივად გადახდილი თანხა (კუპონის ფასდაკლების გათვალისწინებით). დამატებით საკომისიოს არ ვიღებთ.
თუ კომპანიაზე RS.ge-ის ანგარიშ-ფაქტურა იყო გამოწერილი, კანონის შესაბამისად მოხდება მისი კორექტირება.

7. კორპორატიული შეკვეთები

კორპორატიული შეთავაზების საფუძველზე გაფორმებულ შეკვეთაზე ვრცელდება ეს პოლიტიკა და შეთავაზების ინდივიდუალური პირობები (მაგ. გამოწერაში ანგარიშების რაოდენობის ცვლილება). კანონი „მომხმარებლის უფლებების დაცვის შესახებ“ ფიზიკურ პირ მომხმარებელს იცავს; კომპანიებთან ურთიერთობა ძირითადად შეთავაზების პირობებით რეგულირდება.

8. დავები

თუ ჩვენი პასუხი არ გაკმაყოფილებთ, შეგიძლიათ მიმართოთ საქართველოს კონკურენციისა და მომხმარებლის დაცვის სააგენტოს, მედიაციას ან სასამართლოს.

← მთავარ გვერდზე